Agar aap ripped body banana chahte hai to ye 5 chize khana chod dein

Table of Contents

Hello Friends

Dosto sabhi jaante hai ki body banana koi asaan kaam nahi hai balki bada he mushkil kaam hai. chaahe koi supplements use kare ya steroids ka sahara le ya fir naturally body banaye. Body banane ke liye bohut he mehnat karni padti hai. isliye duniya me gine chune log he ek achi body bana paate hain or baaki log sirf sapne dekhte reh jaate hai or ek bodybuilder ko dekh ke sochte hai ki kaash hamari bhi aisi body hoti. Or mehnat ke sath sath achi diet lena bhi utna he zaruri hota hai jitna body banane ke liye exercise ko sahi technique se karna. Balki main to kahunga ki body banane ke liye exercise karna 30 percent or diet lena 70 percent zaruri hota hai, tabhi aapki achi body ban sakti hai.

Ek achi ripped body paani hai to ye 5 chize aap bilkul bhi consume na kare. Kyuki yeh chize aapke muscles badhaane ke process ko band kar degi or fat badha degi. Or agar fat aapki body me badh gaya to wo muscles ko grow nahi hone dega. To is article mein hum aisi he kuch chizo ke bare me baat karne waale hai jo khaane ya peene me bohut tasty lagti hai, par hamari body ke liye bohut he nuksaan daayak hai. isiliye hum baat karenge khaane peene ki aisi chizo ki jinhe hum dekh ke bhi andekha kar dete hai or apni life mein unko consume karke entry de dete hai. to chaliye ab shuru karte hai.

SOFT DRINK

Soft drink laakho logo ka manpasand beverage hai. lekin yaad rakhe zyada soft drink peene se type 2 diabetes, heart disease or anya gambhir bimariya aapke sharir ko jakad sakti hai. Workout ke baad agar hum ek glass warm water consume karte hai, to iska taste bhale he kisiko acha na lage, par ye metabolic rate ko increase zarur kar dega. Or iske vipreet agar hum bazaar me aane wali koi bhi cold drink consume karte hai, to yeh ek tasty option to hoga par ye aapke metabolism ko slow kar dega or aapke fat burning enzymes ko destroy kar dega. Or diabetic patient ke liye cold drink ek zeher ke samaan hai. yadi kisi ko bhi diabetic problem hai to aise logo ke liye soft drink se door rehne me he bhalaayi hai. To ek ache workout ya ek busy day ke baad kabhi bhi soft drink consume na kare.

DOUGHNUT

Don’t ever eat doughnuts. Doughnuts are very bad choice for your heart. Ye fried or bohut zyada sugary hote hai. jiska matlab hai ke aap ise khaake apni body me saturated or transfat ko entry de rahe hain. Hong-kong me ek survey ke doraan ye baat saamne aayi ke 1 doughnut me chocolate or chips se bhi zyada saturated trans fat hota hai. Inme nutrients ki bohut bhaari maatra me kami hoti hai or ye aapki body me fat store karte hai. Isliye doughnuts ko khane se humesha bache. Aap isi se andaaza laga sakte hai ki ek bade chocolaty doughnut mein lagbhag 300 calories kea as paas hoti hai. or kuch bade brands ki baat ki jaaye to kisi kisi me 600 se 700 calories bhi hoti hai jisme 25g se 30g sugar include hoti hain.

POTATO CHIPS

Potato starch se bharpur hota hai or ye sabhi jaante hai, jo ki ek way me healthy bhi hai. par chips me hota hai processed starch. Jiski koi nutritional value nahi hoti hai. or inme calories bhi badi unchi maatra me paayi jaati hai. Agar chips aap regular basis pe khaate hai, to aap kuch khaas nutrition nahi le rahe hai. Because they are low in vitamins and minerals. Ek normal chips ki jageh aap baked potato chips consume kar sakte hai kyuki iske muqaable ye bohut healthy hai. Lekin india me na ke barabar companies hai jo baked potato chips banati hai. to baked potato chips ko dhundna india me thoda mushkil sa ho jaata hai. Ek 100g ke potato chips ke packet me lagbhag 500 se 600 calories hoti hai.

BUFFALO MILK

Kabhi bhi bhains ka doodh ya normal doodh jo hamare ghar me chaai banane me istmaal hota hai ya peene ke liye istmaal hota hai, use kabhi bhi naa piye. Iski jageh low fat milk piye jo ki high in protein hota hai or zyada laabhdaayak hota hai. kyuki bhains ke doodh me bohut fat hota hai or itna fat aap consume karenge to din bhar me apne sharir pe bohut charbi chadha lenge. Ab aap soch rahe honge ki buffalo milk to bohut he paushtik hota hai ye to humne bachpan se padha hai. lekin hum yaha baat kar rahe hai ripped body ki isliye mana kiya hai buffalo milk. Agar aap patle hai to bilkul aap ye consume kar sakte hai.

ICE CREAM

Ice cream heavy carbs ka pitara hai or ise zyada khaane par aap zyada refind carbs apni body me daalenge. Or agar aapka goal abs banane ka hai ya aap abs banane ka soch rahe hain or sath he ice cream bhi ghapa ghap kha rahe hai ya consume kar rahe hai to bhul jaaye ke kabhi life mein aapke abs banenge. Kyuki zyada ice cream khaane se aapke abs to nahi par haan belly fat zarur nikal aaega. India ki most of the companies hydrogenated fat use karte hai jo ki cheap source hai fat ka or hamari body ke liye bilkul bhi acha nahi hai. kuch ice creams ke 1 cup me 300 se 350 calories hoti hai. Lekin achi khabar ek ye bhi hai ki kuch companies saamne nikal kar aayi hai jo ki low fat or low calories ice cream market me laayi hai or kuch lane wali hai.

To dosto ye 5 chize hai jo ki aapko avoid karni hai agar aap ek ripped yani kasi hui bodi banana chahte hai ek fitness model ki tareh. In baato pe dhayaan dein, healthy rahe or workout karte rahe. Or haan dekhiye aakhir hum bhi insaan hai or naa chaahte hue bhi hamara man kar he jaata hai swaadish chize khaane ko. To aap apna man na mare bus taste ke liye thoda sa chakh lein. Par in chizo ko khaane ki aadat naa dale. Kyuki aap maane ya naa maane aaj nahi to kal aisi chize hadh se zyada consume karne se aapko doctor ki shakal dekhni pad sakti hai. To aashaa karta hu ki aapko ye article pasand aya hoga. Is article se jude koi sawaal aapke man me ho to aap comment box me comment karke puch sakte hai. dhanyawaad.